غزل بهاریه

---

---

بهاره    اولدی   بوروندی  چمن  یاشیل  شاله

دوشوبدی   بلبل    شوریده    اوزگه     احواله 

صبا   یلی    گتورور   عطرینی    مشاملره 

بزندی    گل   لریله   مرده  یر  گلوب    حاله

بولوطلار  امر  خدائیله  چاخماقین  چالوری

یاغش  یاغور  دولور آرخلار  سو ئیله هر چاله

آخاندا  سیل  ورور  سیلی مرده لر دورسون

اوزینی   داغ  داشا  چرپور  او  سهملی ژاله

گیدور  تاپور  اوزی  آخرده   دریالار   یولونی 

گونی   گچور  آیا  تبدیل   اولور  آیی   ساله

چوبانلارون   آچلوبدور  داخی  گلی   گلدن

سوری  سوری  یاییلور  گوسفند  و  بزغاله

گل  اوزلری  باخوری  گل لره  گولومسونوری

سینه  سی داغلدی  گل لر ایچنده تک لاله

اوداغلی  سینه ده وار درک اولونسا چوخ سوزلر

گورنده   بلبل  اودور   سینه دن  چکر   ناله

گل اُسته  هی   اوخوری  خوش  ترانه بلبل لر

چاتوبدی   بلبل    آواره     یاخشی    آماله 

جهاندا  بلبل و  گولدن  دانشیر  ((عینی فرد))

بریسی  یوخدی دیسون ساکت اول بو نقاله

(استاد حاج غلامرضا عینی فرد)

---